Obernaar Rahel mit ihren Trabanten

Madeleine

Trabi Nommer eis esch de totali Teamplayer,
e lute Dräi ond Angelponkt be jedere füechtfröhleche Feier.
Wenn’s öppis zwärche get, esch si no vöu me em Elemänt.
Dirigiert eusi Mannschaft met Charme ond eme läbige Temperamänt.
Esch se am Gigele – esch secher öppis „de Börner“
So nemmt eusi „Nätti“ gärn ou mou anderi Wagebouer of d’Hörner.
ond macht us jedere no so schräge Situation e gueti Schtemmig.
De absoluti Ufschtöuer, technisch begabt ond säute bes gar nie gremmig.
met dene Qualitäte esch d’Madeleine för me ganz klar
ned nor e super Trabi sondern di bescht Stöuverträteri aus Obernaar.

Chregi

Trabi nommer zwöi, bringt eus di musikalisch Note.
Se liebts gsellig ond trenkt näb Bier ou gärn chli Rote.
Üsi ehemalig Stobeschriberi esch en schtöui Gnüsseri met vöune Talänt
drü chline Chend ond eme fine Göuer Akzänt.
Met ere han eg scho Nächtelang Rhyme dräit ond gwändet
bes ändlech s’Rätschwyber Programm esch gsi volländet.
Näbscht Usdur bem Värsle ond dechte ond ere guete Prise Humor
brengt s Chregi mit Flöte, Gige, Gitarre, Örgeli e mega-Musig-Kompetänz-Faktor

Corinne

Es Tanzfödle esch Trabi Nommer drei.
Se wedmet sech ganz em Schtöue de Pinselei
Se Chläbt, Limet ond Molet sit Johre eusi stilvolle Latärne.
Die Kreatione met decke Froue, Flogzüg, Vöugu oder Schtärne.
Was se öber d’Johre aus Originells het gschnorpft ond usprobiert
do hei mer andere näbedra nis mängisch grad chli blamiert.
Eri Rocksäckli, Hüet ond Koschtüm Verzierige si legendär
Wenn au immer s’Styling perfekt schtemmt, chonnt d’Corinne dehär.

Laetitia

Aber haut, s’perfekte Styling trefft’s ou för d’Trabantin vier.
Fasnacht esch eres Läbeselixier.
Näbscht eme usgeprägte organisatorische Talänt
Setzt se vor auem be eusne Koschtüm einzigartigi Akzänt.
Multitasking fähig leferet se zo jedem Thema höchschti Qualität.
Si het guets Setzläder ond got hei emmer ersch z’Obe schpät.
pröblet ond teschtet gärn nöi Idee us bes z’Obe schpät.
Ere Enthusiasmus esch allgägewärtig e setige Momänt.
Üsi Finanzfrou Laetitia het d’Idee Pipeline voll ond riisst eus met zo 100%.

Béa

Euse föifti ond letschti Trabi – esch es Böndel vou Emotione pur.
Mystische Spassfaktor ond ex-Chlöpfer Frohnatur.
Das schtolze Grosi het set es paar Johr scho eusi Clique em Griff.
Wenn aus nüt me nötzt höuft vo ere e lute Pfeff.
Wenns drom goht die rechtige Lüt zäme zbrenge
om nes guets Resultat z errenge,
denn esch eusi Béa met Egu im Elemänt
ond zeigt üs di ganz Palette vo erem Show Talänt.

Met dene föif Trabis nemm eg auso d’Fasnacht 2018 in Agreff.
Eg schtoh zwar zvorderscht, aber ersch zäme gäbe mer dere Woche de rechtig Schleff.

Eg be schtolz ond glöcklech, dass d‘Rätschwyber me aus Obernaar döi träge
ond das hoffentli em Februar be Sonneschin ond ohni Räge.
So wird das Ereignis Obernaar 2018 weder einisch onbeschriblech
schön ond wiblech.

Obernaar Rahel